هذه قصيدة شعبيه عن الحب
سمعتها واحببت ان انقلها لكم
ارجو ان تعجبكم
ان الكلام في الحب كثير جدا ولكن نموت ولا نعرفه كما هو على حقيقته
لان كل منا يراه كمايريد او كما يعيشه
اني اذا حبيت احبك من ضمير
روحي شمعة ليل تذبل من تحب
واذا اكرهك الله يستر من وراي
وضلت بكيفك تكمل ؟ تنسحب
تريد تعشك راح تلكـــاني ملاك
وحضن دافي ..ورد والوان وعشب
وانت اذا رايد لعب؟ لعب
اهلا تعال هاي سهله وحتى ما ييها تعب
العبك والعب على اللعبو عليك
العلمك تلعب اعلمه على اللعب
اتريدني اسهل سهل وياي صير
تريد تصعب راح تلكاني صعب
تريد من عندي عشك انطي حنان
تريد من عندي ذهب انطي ذهب
تريد من عندي وصل انطي وفاك
تريد تنطيني جذب تاخذ من عندي جذب
ولان واحد كلبي واحد يبقى بيه
اني ماعندي حبيبين بكلب
اني مثل النار تنطيها تزيد
منها تاخذ راح من يمك تشب
عيني اذا ما بيك تمليها حنان
راح من تروح لاجلك ما تصب
وباب كلبي اذا ما تحنيه ايديك
لو شلعت الباب ما تكدر تطب
تريد تكسرني صعب لين اصير
اتريد تعصرني تلاكيني صلب
بكيفك اني شلون مارايدني اصير
جاهز اني ومنتضر عند الطلب
الخشب نفسه تريد تصنع بيه خراب
اتريد كرسي ملك تصنع بالخشب
اني طبعي ويه العشك نخله ويه كاع
اذا ماكو ماي ماكو رطب
وابد لاتستغرب الحب لو عذاب
هي رحمة لبست هدوم التعصب
الحب جرح لمن تداويه تحتويه
والجرح لمن تهجرة يلتهب
بالعشك كلشي اكو كلشي يصير
اكو بالغصب واكو لا مو غصب
لا تستغرب لاجل الي تحبه تموت
بالعشك ماكو عجب بس العجب
ناس ماتت حتى الي تحبه يعيش
وناس عاشت لاجل التحبه يحب
بيوت عمرت بالعشك صارت قصور
وبالعشك نفسه الف بيت انخرب
اثنين يعني الحب اذا ثالث يفوت
حرف ثالث فات يتحول حرب
المثل مايضربوه اذا عاشك اسير
المثل مرات بالحب ينضرب
موش اكو حب يستمر يعني صحيح
وموش اكو حب ينتهي يعني نصب
اكو حب ينتهي بس ذكراه يعيش
واكو حب يستمر بس اسمه انشطب
سبب حبك اذا تلكاه لاتكول
احلى حب لمن تحب بلا سبب
الأحد أبريل 28, 2013 8:03 am من طرف شذى الورد
